平常留言 - 給凱芹的信

[寫新訊息] | [平常留言] | [Chris Wong Gallery]

中秋快樂~原創分享:【嫦娥奔月】
Letter Posted by 咪 (monkey80118@hotmail.com) on 5-09-2011 1:01 pm
凱芹,

昨天跟你見到面,真的太開心了!可惜因為我之前早上七時才收工,回家睡死了,一時半才起床,立即飛車出來,但活動已開始,歌也已唱了,噢噢!活動上你說很少人在這裡留言給你,其實是因為大家也太忙了,大家知道你安好,你又知道大家安好,心中有對方,這也很足夠啦!不得不讚,你的記性真好!

得悉你將會在中秋節到美國登台,然後又到廣西拍攝宣明會特輯,真忙哩!有機會我也很想跟宣明會去探訪,希望能感受各處的民生文化,讓更多人知道世界之大,自己的渺小,很多人需要幫忙的哩!不過路上你要一切小心呀!上星期我到了東莞為一間假髮廠拍攝,在砌Jib時中指被支Jib夾到了,痛到入心入肺!但最終也能渣到支Jib順利進行拍攝,沒有remote沒有Pan挑Zoom,沒有難度。只希望快點買個remote,能拍到更美的鏡頭。現在中指還有半片指甲是瘀了的,不過瘀色很美,哈!

我們是中國人嘛,所以我特別喜歡中國的節日(當然七月節例外)。其實每個中國的節日也有著它特有的意義(也包括七月節,哈!),背後也有很多不同版本的故事流傳著,這次想跟你分享我多年前寫過的一個廣播劇:【嫦娥奔月】。這是多年前為RTHK的一個兒童節目寫的,聽到小朋友聲演出來,感覺真的很奇妙,他們真的演得很好,演出了我劇本寫的精髓哩!

正因為自己讀書少,接觸了戲劇後近十年方知道讀書的重要性,可惜書到用時方恨少,為時已晚,唯有將勤補拙,致使現在染上讀癮,不能自拔!前陣子前輩說我寫的文章太冗長,不夠精簡,除了自己,別人沒心機看(你呢?會悶吧?但我收不到手呀!!!)。就像中國文字,很多字也能一個字便解釋了很多意思,但我偏偏要花很多筆墨才能表達,所以介紹了我看那些論語、道德經等,於是我又買了很多史記、論語、老子、莊子、資治通鑑等,可惜,原來我統統看不懂!這又再讓我明白多一個道理,這些只是門面功夫,沒有內涵就是沒有料子,那管多費心力,始終底子差,窮一生精力也不成,內裡沒貨是裝不了型灑的哩!尤其是在你這才子面前,更是汗顏!

好了,還是介紹這次的【嫦娥奔月】吧!多年前的中秋節臨近,為著要寫廣播劇劇本,於是想寫一個關於中秋節的故事,翻查很多關於中秋節傳說的資料,對於嫦娥與后羿和吳剛的故事也有很多個版本,於是便想出了自己的一個低能版本,或者你看了會真的覺得很低能,對呀!我滿腦子就只有這些市井傻構想而已。不過,這劇本的對象是小朋友,所以我還是選擇了用簡單的方法去引起小朋友對中國節日的興趣,而不以歷史說教方式表達啦!

希望你喜歡啦!
預祝
中秋節快樂

小詞窮 咪 上

-----------------------------------------------------------

廣播劇【嫦娥奔月】

改編意念來源:

【嫦娥奔月】是個家傳戶曉的民間故事,多年來已有很多不同的版本、不同的說法,有說后羿是個暴君,也有說嫦娥貪心的偷了仙丹。編者這次想把主要角色塑造成為正面的人物,再配以生動有趣的情節及對白,把這個新編的【嫦娥奔月】故事在中秋節前夕帶給所有大朋友、小朋友,希望大家一同渡過一個花好月圓中秋夜。

故事大綱:

相傳在遠古時代,有十個太陽一齊出現在天空,曬得土地乾裂,海水枯竭,民不聊生。

在一條村莊裡有個名叫后羿的年青人,他力大無窮,以打獵為生,可惜天資愚蠢,容易受人欺騙。村民飽受日曬之苦,紛紛推舉后羿作為代表去把太陽射下來,后羿不知道原來這任務有一定的危險程度,然而挺身而出去射日。

后羿舉起他的弓,一口氣射下了九個太陽,第十個太陽拼命求饒,並答應日後與月亮輪班工作,不至於地面繼續飽受熾熱煎熬之苦。

有一天,后羿在打獵的途中遇到一隻野豬,他想射回去送給娘親,不料野豬向后羿求繞,后羿在同情心驅使之下放了野豬,野豬搖身一變,變成了豬神,並送后羿一粒仙丹,說吃了這仙丹便能長生不老,成仙昇天。

后羿回去後,把仙丹這件事告訴紅顏知己嫦娥,並打算把仙丹送給另一村童肥仔的媽媽,這事遭嫦娥反對,因為后羿的媽媽身體比肥仔的媽媽還要差,她認為后羿應該讓自己的媽媽吃這粒仙丹。於是,仙丹由嫦娥代為保管著,待后羿的媽媽從城裡回來後便送給她老人家。

不料,肥仔竟趁后羿外出打獵時向嫦娥索取仙丹,他以為仙丹可以減肥,求嫦娥把仙丹給他,嫦娥不答允,在混亂下把仙丹吞下,立刻身輕如燕,直衝雲霄,往月宮飛奔而去了。

由於嫦娥奔月的那天,正巧是八月十五,於是每年的八月十五,后羿和鄉親們便會在月下擺水果祭月,表達他們對嫦娥的思念。此後世代相傳,人們就把八月十五定為中秋節。

角色:(主要可以由六至七個演員分飾)
說故事的人(男或女也可)、后羿、嫦娥、太陽(一至十)、野豬神、肥仔、眾村民

劇本

故:相傳響好耐好耐之前,響好遠好遠嘅一條村裡面,有十個太陽一齊響天空出現,曬到土地乾裂、海水枯竭、民不聊生。真係好熱呀!

眾村民:(七嘴八舌地)好曬呀…好熱呀…熱死人喇!
肥仔:點解會有咁多個太陽架?想曬死人咩!
后羿:肥仔,心靜自然涼呀。
肥仔:咁熱,又咁曬,又冇水飲,又光殘殘,又瞓唔到覺,大力仔呀,你睇吓吖,我就黎比D太陽曬熟喇!
后羿:最多我幫你撥涼吖!
嫦娥:有成十個太陽咁多,都唔係辦法架喎!
肥仔:係呀,我娘親都係得我一個孩兒之嘛,駛乜要咁多個喎!
嫦娥:如果我哋可以將D太陽射哂落嚟,咁就唔會咁熱啦!
眾村民:好主意呀!嫦娥真係聰明喇!好呀!
嫦娥:但係邊個去射好呢?
肥仔:……我唔得架!咁曬,我望都望唔到佢哋呀!……不如……大力仔吖!大力仔咁大力,佢一定得架!
嫦娥:后羿哥哥?
眾村民:好呀!后羿得呀!佢夠大力呀!一定可以射哂D太陽落嚟架!
后羿:哦,冇所謂吖!
眾村民:大力仔!后羿!靠哂你喇!
后羿:但係……嫦娥妹妹呀?應該行去邊度先射到太陽呀?

【音樂過場】

故:於是,后羿呢個大力仔就被村民推選咗佢去射太陽喇。佢聽從嫦娥妹妹嘅分析,行到去一個最接近呢十個太陽嘅山頭,真係行到汗流浹背呀。后羿好努力咁睜大佢對眼,拎起弓箭,對準D太陽射過去。
后羿:第一個!

【人扮發箭聲】

(此段各太陽可以用不同聲音演繹各太陽中箭掉下的方式)

太陽1:噢~
后羿:第二個!

【人扮發箭聲】

太陽2:哎吔~
后羿:第三個!

【人扮發箭聲】

太陽3:呀~
后羿:第四個!

【人扮發箭聲】

太陽4:嘩~
后羿:第五個!

【人扮發箭聲】

太陽5:救~命~
后羿:第六個!

【人扮發箭聲】

太陽6:唔~好~
后羿:第七個!

【人扮發箭聲】

太陽7:哈哈!你射唔到我~哎吔~
后羿:第八個!

【人扮發箭聲】

太陽8:走得快~好世~噢~
后羿:好!淨返兩個。
太陽9:你射佢先啦,大讓細,我比佢先!
后羿:你咁鍚佢,我就射你先!

【人扮發箭聲】

太陽9:射佢先~~呀……
后羿:最後一個。
太陽10:(大哭)唔好呀英雄,箭下留陽呀!
后羿:你唔好喊啦!你乖乖哋比我射咗你落嚟,我哋就唔駛咁熱喇!
太陽10:英雄,你已經射咗我10個哥哥姐姐喇,而家淨返我一個,你唔可以射埋我架!
后羿:點解呀?
太陽10:如果你射咗我,呢個世界咪唔會有光明囉,你怕唔怕黑吖?
后羿:怕呀!……不過……你成日曬住,肥仔佢瞓唔到覺喎!
太陽10:但係如果冇咗太陽嘅照耀,農作物都唔可以生長架!
后羿:咁點算呀?
太陽10:咁吖,我應承你,我去搵月亮姐姐傾傾,我哋可以輪班工作,咁咪唔會成日都咁曬囉。好嗎?
后羿:又好!咁你記住乖乖哋,同月亮姐姐定時換班喎!
太陽10:多謝英雄不殺之恩!

【音樂過場】

故:就係咁,大地一切回復正常,村民終於可以安居樂業。有一日,后羿去到森林打獵,遇到一隻野豬。
后羿:咦,呢隻野豬好似好好味喎!等我射佢返去比娘親食先。
故:正當后羿準備拉弓射野豬之際。。。
野豬:英雄,求吓你唔好射我呀!
后羿:我求吓你比我射啦!我已經好耐冇射到獵物喇!再係咁,我哋會餓死架!
野豬:我屋企都有一家大細豬仔等住我養架,你殺咗我,咁佢哋點算喎。
后羿:原來你咁慘架?
野豬:係呀!我好慘架!
后羿:咁好啦!我唯有放咗你啦!
野豬:多謝你呀,英雄!
后羿:咁你小心D,唔好比其他獵人發現你喎。
野豬:年青人,你真係好心地喇!

【音樂過場】

故:呢個時候,野豬搖身一變,變成咗一個神仙喎。

【可以由人扮的野豬變豬神的特別音效】

后羿:點解會咁架?你究竟係豬定係人呀?
野豬神:其實我係神仙,我叫做豬神,我都聽聞過你射低九個太陽呢件事,今日比我遇到你,知道原來你真係一個善良嘅年青人,好啦!我就送樣嘢比你啦!
后羿:係咩呀?你響度捽乜嘢呀?
野豬神:嗱!呢粒就係仙丹,只要你食咗佢,就會身輕如燕,長生不老,成仙昇天架喇!
后羿:多謝你呀豬神!

【音樂過場】

故:於是,后羿就拎住豬神送比佢嘅仙丹返去搵嫦娥,將成件事話比嫦娥知喇!
后羿:就係咁,豬神就送咗呢粒仙丹比我喇!
嫦娥:咁你打算點用呢粒仙丹呀?
后羿:我打算送比肥仔娘親呀。
嫦娥:點解送比肥仔娘親呀?
后羿:你睇吓肥仔幾肥吖,而佢娘親就骨瘦如柴,佢娘親好慘架!有乜好嘢都比哂肥仔食,我諗住送比肥仔娘親嚟補身囉。
嫦娥:但係你自己娘親呢?
后羿:唔怕,我有手有腳,可以勤力D射獵養娘親。
嫦娥:但係你娘親啱啱先至入咗城度睇大夫,佢身體比肥仔娘親仲差,百行以孝為先,你係咪應該留比你自己娘親呀?
后羿:娘親教我,老吾老以及人之老,娘親佢會明白我心意架!
嫦娥:后羿哥哥呀!你呢個係治標唔治本嘅方法呀!肥仔咁肥就應該減肥,唔係食仙丹呀!相反,你娘親體弱多病,你比粒仙丹佢食,等佢成仙昇天,仙福永享嘛!
后羿:聽落又係道理,咁好啦!嫦娥妹妹,你幫我補管住粒仙丹,娘親返到嚟就比佢食啦!我出去射獵喇!
嫦娥:小心D呀后羿哥哥。

【音樂過場】

故:原來肥仔一直響則邊聽到后羿同嫦娥嘅對話,佢等到后羿走咗之後,就出嚟問嫦娥拎粒仙丹喇。
肥仔:嫦娥,比返我!
嫦娥:比乜嘢你呀?
肥仔:粒減肥藥呀!
嫦娥:咩減肥藥呀?
肥仔:你唔駛講大話喇!我頭先聽到哂你同大力仔講嘅嘢,佢話將呢粒減肥藥送比我架!有咗佢,我食幾多嘢都冇問題啦!
嫦娥:呢粒唔係減肥藥嚟架!你要減肥嘅話,自己做運動加節食啦!
肥仔:嫦娥,獨食難瘦喎!
嫦娥:我係唔會比你架!
肥仔:如果你唔比我嘅話,我就出絕招!
嫦娥:咩絕招呀?
肥仔:如果你唔比我嘅話,我就唱歌!
嫦娥:唱咩歌呀?
肥仔:(像朗誦邊唱)嫦娥妹,后羿哥,歡天喜地笑呵呵。
嫦娥:唔比唱!
肥仔:(繼續唱)嫦娥妹鍾意后羿哥,八月十五快樂多。
嫦娥:我話唔比唱呀!
肥仔:你唔比粒減肥藥我,我就繼續唱!唱到全村人都知!
嫦娥:你唔好迫我呀!
肥仔:駛唔駛我幫你同后羿哥講呀!哈哈!(繼續唱)嫦娥妹,后羿哥,歡天喜地笑呵呵。嫦娥妹鍾意后羿哥,八月十五快樂多……
嫦娥:你再唱,我就食咗粒仙丹!
肥仔:你唔好食呀!你唔好咁傻呀!(繼續唱)嫦娥妹,后羿哥,歡天喜地笑呵呵。嫦娥妹鍾意后羿哥,八月十五快樂多……
嫦娥:你仲唱?
肥仔:我唱到停唔到口呀!(繼續唱)嫦娥妹,后羿哥……
嫦娥:(嫦娥吃了仙丹,啃東西聲)咳咳!
肥仔:(慘叫)呀!你做乜做埋D傻事呀?我都叫咗你唔好食架啦!
嫦娥:我一時唔小心咋!
肥仔:你做乜會飛起架?
嫦娥:我都唔知呀!
肥仔:我都話呢粒係減肥藥嚟架啦!你睇吓,你食咗就輕到識飛喇!
嫦娥:救我呀肥仔!
肥仔:你想飛去邊呀?
嫦娥:我都唔知呀!
肥仔:果邊係太陽,好曬架!
嫦娥:咁……我唯有飛去月亮度啦!你幫我同后羿哥哥同埋各位村民講再見喇!
肥仔:你咁忍心拋低我一個響度呀?
嫦娥:放心啦肥仔,第日做左神仙,我會接埋你哋架!

【音樂過場】

故:由於嫦娥奔月呢一日,就係農曆八月十五,於是每年嘅農曆八月十五,后羿同埋村民都會響月下擺放水果祭月,表達佢哋對嫦娥嘅思念。此後世代相傳,D人就將農曆八月十五定為中秋節喇!

唔講唔知喎!原來嫦娥先至係第一個踏足月球嘅中國人添呀!

《完》